Të dashur nxënës, të nderuar profesorë, prindër dhe ju miq, mirë se vini në uebfaqen e Gjimnazit “Skënderbeu” të Kaçanikut! Gjimnazi ynë, si çdo institucion arsimor, ka për qëllim t’i ofrojë komunitetit shërbim të çmueshëm, gjithmonë me përpjekjen e ngritjes së cilësisë dhe të kushteve mësimore. Edukimi i nxënësve, rritja e intelektit të tyre dhe përgatitja diturore për nivelin universitar është synimi kryesor i shkollës sonë. Gjimnazi “Skënderbeu” zotohet të çojë përpara reformat arsimore me nxënësin në qendër. Stafi arsimor është i kualifikuar dhe i përgatitur profesionalisht që t’iu ofrojë njohuritë e duhura shkencore nxënësve, duke kontribuar në krijimin e shprehive pozitive dhe në mësimnxënien bashkëkohore drejt shtigjeve të ardhmërisë. Gjimnazi “Skënderbeu”, në bashkëpunim me institucionet tjera arsimore dhe partnerët e vet, po përpiqet vazhdimisht për zhvillimin e infrastrukturës bashkëkohore, me theks të veçantë përparimin e qasjes në fushën e teknologjisë informative. Prej fillimvitit shkollor 2011/’12 kemi nisur punën edhe me laboratorin e mësimit elektronik, projekt ky i mbështetur me shumë pajisje edhe nga Komisioni Evropian. Ndërkaq, një ndër shembujt e përparimit tonë është edhe kjo uebfaqe, projekt i cili bashkësisë sonë i vie edhe si një dhuratë pune dhe arritjeje në përkim të 100-vjetorit të Pavarësisë së Shqipërisë! Punë e mbarë së bashku!